ديزج هارايي
آذربايجان وديزج علي قلي بيگ
یاییلیب : دوشنبه 9 مرداد 1391 | یازار : taymaz | بؤلوم : بيلگي | 0 باخيش لار

درين دورو باخيشيندا

دولو دولو بير عوموروار

ياز نفسلي اومودلارلا

گونش دوغان افقلره

آرزو يوكلو يئلكنلري  يوللانديران.

 

خان آرازين حسرتيدير

سورگون قارانقوشلاريلا

قان بويالي شفقلره قاتارلانان

 

سؤيلنمه ميش بويلار بويوندا اؤرتولن

آغير ايللر خزانيندا

ترك ائلينين سازلي سؤزلو گوهرينين

ايكي اوزلو ياد الينده

اوجوزلانماق آغريسيدير

ناخيش ناخيش اياقلانان

ايلمك ايلمك اوتانمازجا بودارلانان

ايپك معنا خاليسينين نيسگيليدير

 

درين دورو باخيشيندا بوي گؤسترن

سولماز سئوگي باهاريندا

باخيش باخيش بوداغلانان

اؤز اولمانين  اؤزگورلويون چاغريسيدير

 

گوروشونون  ايشيغيندا

دوز دؤزوملر دوزلرينين

ميليون ميليون وورغونودور

هاراينا هاراي وئرن

اؤزونده اؤزلويون گؤرن

 

 

 

ياساقلانميش آرزولاردير

اومودلارين گؤي قورشاغي بوياسيندا ياشيللانان

آنا وطن اوره ييدير يارينلارا دؤيونن

وارليغيندا وارليغينا اؤيونن

 

بو آرينميش دورو ديلك  اؤلكه سينده

نسيمي لر دونياسيدير گؤزل لنير

سؤز صرافي فضولودور غزل لنير

اولو ده ده قورقودومدور

الده قوتسال قوپوزيله

چنلي بئللي آشيقلارا اؤيود وئرير

شهرياردير احتشاملي سراييله

سهند ديرپوزولمايان وقاريله

گوموش ساچلي ساحرلرين ساياسيدير

فرزانه لر اوردوسونون قالاسيدير

نطقي لرين  كماليدير

ايگيت بيلگين بالاسيدير

دان يئرينه ايره ليير

 

وارليغينين ايشيغيندا

وراق وراق وارليق اولان خزينه دير زنگينله شير

اونودولان دوننلردير بوگونلره  قوووشور

آيدين اؤزگور يارينلاردير چيچكله نير

سوسدورولان سازلاريمدير اوره كله نير

ساوالانين ياناغيدير لاله لنير

 

باخيشينين ايشيغيندا بير اولوسدور

بئشيك بئشيك باهارلانان

دوغرولارلا ياراقلانان

يالانلارا باش ايمه ين

دؤزن دايانان

دوزوميله  قازانان

 

درين اوزاق گوروشوندور

ائل سؤزونو سؤز ائيله ين

تاراج اولان  تالان اولان

بودارلانان بير بيرلري بيز ائيله ين

بو تورپاغين

بو ائللرين

وارليغينا سارماشيقدير وارليغينيز

ائلين سئوگي سارايندا ياراشيقدير او آدينيز

 

 اول كيمسه كي ائل درديني چكدي قالان اولدو

كؤنلونده ائلين سونسوزا تك يئر سالان  اولدو     

علمين  هنرين   هيئتي وار    اولدوغو گوندن

اؤزكيمليگيميز  وارليغيميز  وار  اولان اولدو

یارپاق لار :

<


Powerd By : ARZUBLOG.COM Theme Designer : Blogskin.ir